என்ஜினீயரிங் படிப்புக்கு 1¼ லட்சம் மாணவர்கள் பதிவு செய்துள்ளனர் 31-ந் தேதி கடைசி நாள்


என்ஜினீயரிங் படிப்புக்கு 1¼ லட்சம் மாணவர்கள் பதிவு செய்துள்ளனர் 31-ந் தேதி கடைசி நாள் | என்ஜினீயரிங் படிப்புக்கு மாணவ-மாணவிகள் ஆன்லைன் மூலம் விண்ணப்பத்தை பதிவு செய்ய 31-ந் தேதி கடைசி நாள். பூர்த்தி செய்யப்பட்டு பதிவிறக்கம் செய்யப்பட்ட படிவம் அண்ணாபல்கலைக்கழகத்திற்கு வந்து சேர ஜூன் 3-ந் தேதி கடைசி நாள். 2017-18-ம் கல்வி ஆண்டுக்கான என்ஜினீயரிங் மாணவர் சேர்க்கைக்கு தமிழகம் முழுவதும் உள்ள என்ஜினீயரிங் கல்லூரிகளில் பி.இ., பி.டெக் படிப்புகளில் மாணவ -மாணவிகள் சேர்வதற்கு எந்த வித நுழைவுத்தேர்வும் கிடையாது. கடந்த ஆண்டு போலவே பிளஸ்-2 மதிப்பெண்கள் அடிப்படையில் மாணவர் சேர்க்கை நடைபெற உள்ளது. கடந்த 12-ந் தேதி பிளஸ்-2 தேர்வு முடிவு வெளியிடப்பட்டது. அதன்பிறகு மாணவ-மாணவிகள் பெற்ற மதிப்பெண்களை ஏற்கனவே ஆன்-லைனில் பதிவு செய்திருந்த விண்ணப்ப படிவத்தில் பூர்த்தி செய்தனர். சிலர் பிளஸ்-2 தேர்வு முடிவு வெளி வந்தபிறகு ஆன்லைனில் மதிப்பெண்களை பதிந்தனர். ஆனால் நிரப்பப்பட்ட விண்ணப்பத்தை அண்ணா பல்கலைக்கழகத்தில் சமர்ப்பிக்க அடுத்த மாதம் (ஜூன்) 3-ந் தேதி கடைசிநாள். கடந்த ஆண்டு வரை விண்ணப்ப கட்டணம் டி.டி. எடுத்து அனுப்பப்பட்டது. ஆனால் இந்த வருடம் முதல் ஆன்-லைன் மூலமே பணம் செலுத்த வேண்டும். அவ்வாறு பலர் பணம் செலுத்தி வருகிறார்கள். நிரப்பப்பட்ட விண்ணப்பத்துடன் தேவையான சான்றிதழ்களையும் சேர்த்து 'செயலாளர், தமிழ்நாடு என்ஜினீயரிங் அட்மிஷன், அண்ணா பல்கலைக்கழகம், கிண்டி, சென்னை-600025', என்ற முகவரிக்கு அனுப்பி வருகிறார்கள். சிலர்தான் விண்ணப்பத்தை பூர்த்தி செய்து பதிவிறக்கம் செய்து அனுப்பி உள்ளனர். இதுவரை 1¼ லட்சம் பேர் விண்ணப்பத்தை பதிவு செய்துள்ளனர். இன்னும் பதிவு செய்ய நாள் இருக்கிறது. 31-ந் தேதி தான் இறுதி நாள். இந்த தகவலை என்ஜினீயரிங் மாணவர் சேர்க்கை செயலாளர் பேராசிரியர் இந்துமதி தெரிவித்தார். இந்த வருடம் மருத்துவ படிப்பில் சேர 'நீட்' தேர்வு எழுத வேண்டும் என்றநிலை ஏற்பட்டதால் தமிழ்நாடு கால்நடை மருத்துவ படிப்பில் சேரவும், கலை மற்றும் அறிவியல் படிப்பில் சேரவும் மாணவ- மாணவிகளிடையே அதிக ஆர்வம் ஏற்படும் என்று எதிர்பார்க்கப்படுகிறது.